Entdecken Sie Caorle

Su le grandi nere ali
se ne va la note
e tremuo opalin albore
avolge in tenero abracio,
el siel, el mar confusi.

Lieve, lieve, magior s'acende,
s'iradia, s'espande,
e destira su l'onda
un trepido veo
de perle l'ucicanti.

Luce, luce, più luce ancora,
in su, in su, sempre più in su;
divampa, sfavila
ricama de oro le nuvoe
basse nel siel.

Armoniosa sinfonia de colori.

Falìve de rubini,
scintìe de smeraldi
trili, arpegi
sui crin de l'onda.

Improvisa,
qual squilo de tromba,
trionfale preludio
un'aureola maestosa,
irompe;sventalia
alto nel siel turchese,
un ragio de dardi infogai.

Ecco el sol che sbuxa l'onda,
e stende sul mar
un tapeo de luci palpitanti,
fin su la spiagia,
fin l'ultima ondina
vissin de mi.

Xe nato el zorno.

Un cocal solitario
inebrià de luce, de aria,
sfarfala nel siel
in alto, in basso, in qua, in là,
come 'na fogia secca sul vento;

l'ala bate svelta,
e subito stesa
se puxa sul refolo matutin,
ondegia, inclina l'àgil piuma
in largo, tondo al campanil.

Nel silensio incantà
el striduo canto espande,
trepido, festoso saludo
al creato, al sol,
al novo zorno.